Коми республикаса юралысь Владимир Уйба тшӧктӧм бӧрти деньгасӧ вичмӧдасны Косланса амбулатория капитальнӧя дзоньталӧм вылӧ.
Амбулаторияӧ ветлӧдлӧ 2300 сайӧ морт – Косланысь да Ыджыдъягысь.
Сылысь стрӧйбасӧ вӧлі кыпӧдӧма 40 во сайын, сэсянь амбулаториясӧ капитальнӧя эз на дзоньтавны.
Колян вося сентябрын тайӧ мытшӧднас Владимир Уйба дінӧ шыӧдчисны районса олысьяс, юралысьлӧн Удораын уджаліг дырйи.
Амбулатория вылӧ торйӧдасны 8 млн шайт. Уджъяссӧ шуӧма помавны во помӧдзыс. Кутасны дзоньтавны стрӧйбалысь вевтсӧ, канализациясӧ да ГВС системасӧ. Амбулатория пытшкӧсын выльмӧдасны штэнъяс, джоджъяс да йиртъяс. Вежлаласны ӧшиньяс да ӧдзӧсъяс.
Документъяс кузя - ставыс нин дась. Коли сӧмын найӧс согласуйтны.
Та кындзи таво Удораын капитальнӧя дзоньталасны Благоевоса да районса шӧр больничаяс. Усогорскын кутчысясны выльмӧдны хирургическӧй да реанимационнӧй вежӧсъяс (отделениеяс), лаборатория, стоматология, ФГС кабинетъяс.
Ставнас дзоньтасьӧм вылӧ лоӧ урчитӧма 47 млн шайт. Сідзжӧ, колян воӧ Удора районса шӧр больничаӧ сетiсны 4 выль машина. Кыксӧ на лыдысь вичмӧдiсны скорӧйлы.